Telur að gengi krónunnar verði veikt áfram

Greining Íslandsbanka telur að gengi krónunnar verði veikt áfram en gengisvísitalan hefur verið að hækka töluvert undanfarna daga.

Í Morgunkorni greiningarinnar segir að gengi krónunnar hefur veikst töluvert gagnvart evru upp á síðkastið, og í raun hefur evran ekki kostað meira á innlendum millibankamarkaði frá því í lok maí á síðasta ári. Nú stendur evran í um 159 krónum en í byrjun síðustu viku kostaði hún rétt rúmar 156 krónur og hefur þar með veikst um 2% á þessum tíma.

Þessi hreyfing á gengi krónunnar kemur ekki spánskt fyrir sjónir enda þarf ekki mikið til þess að hreyfa við gengi myntar þar sem flæði á gjaldeyrismarkaði er jafn takmarkað og hér á landi. Þó er ekki hægt að svara því með óyggjandi hætti hvað sé að valda þessari lækkun krónunnar en telja má upp nokkra þætti sem hér geta átt hlut að máli.

Má hér m.a. nefna kaup Seðlabankans á gjaldeyri, ekki síst undir lok síðasta árs, vaxtaútflæði til erlendra eigenda ríkisbréfa, lítið ferðamannainnflæði og auk þess gætu greiðslufrestir innflutningsaðila á jólainnkaupum, eða greiðslur fyrir nýjar vörur við útsölulok, einnig komið hér við sögu.

„Við teljum að það sé ekki mikil innistæða til styrkingar krónunnar á næstunni, þá vegna sömu þátta og taldir eru upp hér á undan sem koma í veg fyrir styrkingu krónunnar en þar sem gjaldeyrishöftin eru enn við lýði þá er afar ólíklegt að mikil veiking krónunnar eigi sér stað. Með hækkandi sól gæti síðan krónan fengið styrkari stuðning, t.d. vegna aukins ferðamannainnflæðis og innstreymis gjaldeyris tengt erlendri fjárfestingu," segir í Morgunkorninu.