Redknapp: Joe Jordan gæti lamið Gattuso

Harry Redknapp, stjóri Spurs, var í skýjunum með frammistöðu síns liðs sem vann frábæran útivallarsigur á AC Milan í kvöld.

"Þvílík frammistaða hjá mínu liði. Allir leikmenn stóðu sig frábærlega. Ég sagði við strákana í hálfleik að koma boltanum á Lennon því hann var að rúlla bakverðinum upp í allt kvöld. Hann lagði markið frábærlega upp," sagði Redknapp.

"Þetta er frábært kvöld fyrir stuðningsmennina sem og Tottenham. Milan-menn misstu hausinn í lokin og það er gott merki," sagði Redknapp en Gennaro Gattuso skallaði Joe Jordan, aðstoðarmann Redknapps, eftir leikinn.

"Ég veit hvern ég myndi velja ef þeir færu að slást. Ég myndi alltaf setja minn pening á Joe," sagði Redknapp kíminn sem fyrr.