Íslandsbanki hættir að senda út reikningsyfirlit

Íslandsbanki hefur ákveðið að hætta útsendingu reikningsyfirlita til einstaklinga í viðskiptum við bankann. Yfirlitin verða aðgengileg öllum viðskiptavinum í Netbanka, en þeir viðskiptavinir sem óska þess sérstaklega geta fengið yfirlitin prentuð út og send í pappírsformi. Er þetta gert til þess að spara kostnað auk þess sem Íslandsbanki leggur áherslu á að vera umhverfisvænn vinnustaður.

Sparnaður og minnkandi þörf fyrir yfirlit

Mikill meirihluti viðskiptavina notar nú Netbanka til að nálgast öll yfirlit yfir reikninga. Einnig hefur þörf viðskiptavina fyrir áramótayfirlit minnkað verulega eftir að allar upplýsingar um inneignir og vexti á sparireikningum birtast sjálfkrafa á skattframtali. Með því að hætta að senda út reikningsyfirlit sparast töluverður kostnaður auk þess sparnaðar sem verður í pappírsmagni og þeirra jákvæðu áhrifa sem slíkur sparnaður hefur á umhverfið.

Pappírssparnaður uppá 18,5 tonn

Íslandsbanki hefur síðustu 2 ár leitað leiða til að ná fram sparnaði í rekstri og draga úr notkun pappírs í almennri starfsemi. Árið 2009 ákvað bankinn að taka upp nýtt prentkerfi fyrir starfsemi bankans, sem hefur leitt til 18,5 tonna sparnað í prentuðu magni á pappír og verulega minni rafmagnsnotkun. Samhliða þessum sparnaði er ljóst að notkun á prenthylkjum hefur minnkað gríðarlega, með tilheyrandi sparnaði og jákvæðra umhverfisáhrifa. Sú ákvörðun nú að hætta útsendingu reikningsyfirlita er hluti af þessari stefnu bankans.

Þeir viðskiptavinir sem kjósa að fá send yfirlit í pósti geta pantað þau í Netbankanum undir Stillingar. Einnig geta viðskiptavinir óskað eftir yfirlitum með því að hringja í þjónustuver Íslandsbanka í síma 440 4000 eða með því að koma í næsta útibú bankans.