Ríkislögreglustjóri rannsakar kostnað vegna „dótakassa" FL Group

Meintum skattalagabrotum vegna yfirdrifins rekstrarkostnaðar FL Group á árinu 2007 verður vísað til efnahagsbrotadeildar ríkislögreglustjóra. Málið snýst m.a um kostnað vegna hlunninda starfsmanna, eins og leigu á glæsibílum.

FL Group var í góðærinu eitt stærsta fjárfestingarfélag á Íslandi með gífurleg umsvif og fékk Hannes Smárarson forstjóri því mikla athygli. Eftir bankahrun tapaði félagið 350 milljörðum króna, mest af því vegna hruns Glitnis og nafninu var breytt í Stoðir.

Núna eru Stoðir ein skrifstofa í Hátúni mig með aðeins tvo starfsmenn. Júlíus Þorfinnson, framkvæmdastjóra, sem var áður talsmaður FL Group auk starfsmanns sem er honum til aðstoðar. Stöð 2 óskaði eftir viðtali við Júlíus en hann varð ekki við því. Þá fékkst heldur ekki leyfi til þess að mynda skrifstofuna.



Margt vafasamt í rekstrinum

Margt þótti vafasamt í rekstri FL Group fyrir hrun m.a 6,2 milljarða króna rekstrarkostnaður á árinu 2007, sem aldrei hefur fengist fullnægjandi skýring á. Vilhjálmur Bjarnason lektor við HÍ var hluthafi í FL Group og bað um skýringar á þessu á aðalfundi en það var fátt um svör. Hann fékk síðan bréf frá félaginu þar sem félagið gat t.d ekki tjáð sig um greiðslur til félags í eigu Jóns Þórs Sigurðssonar, sem rak glæsibílaleigu fyrir FL Group. Það sem í viðskiptaheiminum var kallað „dótakassi." Þá gat félagið heldur ekki upplýst um kostnað vegna flugferða starfsmanna. „Þetta var allt svona. Það var t.d rekstrarkostnaður vegna dótakassa sem ég kallaði, rekstrarkostnaður upp á hundruð milljóna króna, sem ég fékk ekki nákvæm svör vegna," segir Vilhjálmur.

Stöð 2 fékk staðfest í dag að mál vegna þessa mikla rekstrarkostnaðar væri á leiðinni inn á borð efnahagsbrotadeildar ríkislögreglustjóra og að það færi þangað til rannsóknar vegna meintra skattalagabrota, en embætti skattrannsóknarstjóra hefur haft það til umfjöllunar. Efnahagsbrotadeildin hefur haft FL Group til rannsóknar vegna annarra mála, t.d viðskipta með Sterling flugfélagið og nú mun þetta mál bætast við.

Segir Júlíus hafa logið á launum

Eftir nauðasamninga eignuðust kröfuhafar Stoða félagið. Stærstir eru Landsbankinn, skilanefnd Glitnis og Arion banki. Endurskoðendurnir Ernst & Young voru fengnir til að fara yfir viðskipti sem áttu sér stað fyrir greiðslustöðvun FL Group og mæltu með fjöldanum öllum af viðskiptum sem þeir töldu að skoða þyrfti nánar. Það var á endanum niðurstaðan að fara í fjögur minniháttar riftunarmál. Vilhjálmur segir það sárt. Þá gerir hann einnig athugasemdir við að fyrrverandi talsmaður FL Group sé nú framkvæmdastjóri Stoða. Sjá má viðtal við Vilhjálm í myndskeiði með fréttinni þar sem hann segir að framkvæmdastjóri Stoða hafi logið á launum fyrir FL Group.