Höness segir fjölmiðla hafa eyðilagt leikstíl Robben

Uli Höness, forseti Bayern München, er æfur út í þýska fjölmiðlamenn því hann vill meina að Hollendingurinn Arjen Robben hafi breytt leikstíl sínum vegna gagnrýni fjölmiðlamanna.

Bayern lagði Schalke um helgina og er fjórum stigum á eftir toppliði Dortmund.

"Það eru stanslausar nornaveiðar hjá fjölmiðlamönnum gegn okkar leikmönnum. Ef fjölmiðlar hefðu ekki verið að djöflast svona í Arjen síðustu vikur þá hefði hann skorað tvö eða þrjú mörk í leiknum," sagði Höness reiður.

"Allt þetta helvítis kjaftæði um að hann sé eigingjarn leikmaður hefur orðið þess valdandi að hann er farinn að gefa boltann þegar hann getur farið sjálfur. Þið eruð farnir að hafa allt of mikil áhrif á leikinn."