Nammigræðgi starfsfélaganna spillir oft góðu plani

Guðný Helga Herbertsdóttir, upplýsingafulltrúi Íslandsbanka leggur mikið upp úr góðri heilsu og hollu fæði. Lífið forvitnaðist aðeins um mataræði hennar.

Ég reyni eftir fremsta megni að borða hollan og góðan mat. Nammi­græðgi samstarfsfélaga minna ­spillir reyndar stundum því góða plani sem ég legg upp með á morgnana. Ég kenni þeim að sjálfsögðu um allt sem miður fer í hollustunni.

Mér finnst rosalega gott að fá mér sjeik á morgnana þar sem ég er yfirleitt frekar lystalítil í upphafi dags.

Grænbrúnt jukk

Í uppáhaldssjeiknum mínum er ­spínat, engifer, banani, brómber, mango, lucuma, haframjöl og smá skvetta af appelsínusafa. Úr þessu verður til grænbrúnt jukk sem er þó alveg himneskt á bragðið. Yfirleitt borða ég mikið af grænmeti, kjúklingi og fiski. Mér finnst gaman að elda og prófa nýjar upp­skriftir en nýjasta æðið mitt er að hægelda mat. Með þeim hætti varðveitir maður betur næringuna í matnum fyrir utan að allt sem kemur upp úr þessum potti er sjúklega gott.

Hollt nesti í golfið

Ég er svo búin að lofa mér því að vera dugleg að grípa með mér hollt nesti á golfvöllinn en ég á það til að grípa næstum það sem hendi er næst þegar ég er orðin svöng úti á velli.