Erfiðasta keppni tímabilsins er í Mónakó

Mónakó kappaksturinn fer fram í 59. sinn um komandi helgi. Ekið er um stræti Monte Carlo borgar í Mónakó sem gerir þessa sjöttu umferð í heimsmeistarabaráttunni að stærstu þraut ökumanna í ár.

Í Mónakó hafa margir merkir atburðir í sögu kappakstursins orðið. Þetta er mótið sem allir ökumenn þrá að vinna en sigur krefst gríðarlegs hugrekkis, orku og þolinmæði af ökumönnunum.

Til viðbótar við gríðarlegar kröfur brautarinnar til ökumannsins bætist að Pirelli-dekkin í ár hafa verið einkar erfið viðureignar. Sumir vilja jafnvel meina að dekkjanotkunin og dekkjastjórnunin hafi í raun ráðið úrslitum í mótum ársins. Í Mónakó verður þetta ekki síður mikilvægt.

Brautin liggur, eins og áður sagði, um stræti Monte Carlo borgar. Í Mónakó markar vegriðið brautina og minnstu mistök munu leiða til áreksturs nema fyrir einhverskonar kraftaverk. Vilji einhver klára kappaksturinn þarf hann að vera fullkominn.

Brautarstæðið er glæsilegt. Í fyrstu beygju er ekið fram hjá Saint Devote-kirkju og upp brekkuna sem nefnist Beau Rivage. Á toppi hæðarinnar sveifla ökumenn bílunum umhverfis Casino-torgið fyrir utan hótelið fræga og spilavítið.

Þaðan er brunað aftur niður brekkuna og að hægustu beygju á keppnistímabilinu sem nefnd er erftir hótelinu sem þar stendur. Skömmu síðar, ef allt gengur að óskum, eru ökumenn komnir inn í göngin þar sem birtuskilyrðin eru ömurleg.

Það vandar málið að í miðjum göngunum er hægribeygja sem tekin er með gjöfina í botni. Rétt er að taka fram að í gegnum göngin má ekki nota DRS-vænginn vegna hættunar sem gæti skapast við það.

Því næst æða bílarnir út úr göngunum og niður að flókknum vinstri-hægri-vinstri hlekk áður en ekið er eftir hafnarbakkanum og fram hjá sundlauginni. Þar á eftir er ekið fram hjá La Rascasse veitingahúsinu gula sem frægt er orðið.

Goðsagnir í Mónakó

Það má aldrei gleyma sólríkum laugardegi árið 1989 þegar Ayrton Senna ók tímatökuhring sem var 1,148 sekúndum hraðari en hringur liðsfélaga hans, Alain Prost. Prost var á þessum tíma talinn besti ökuþór í Formúlu 1 og brautin var talin henta honum mjög vel vegna þess hversu þolinmóður og tæknilega fær hann var.

Ayrton Senna var á ráspól svo langt á undan liðsfélaga sínum og heilum tveimur sekúndum á undan þriðja manni. Senna sigraði kappaksturinn svo tæpri mínútu á undan Prost. Það er mögulega einhver ótrúlegasta frammistaða ökumanns í Formúlu 1 frá upphafi. Frammistaða Senna í Mónakó er stór þáttur í því að hann er talinn goðsögn í kappakstursheimum.

Brautin hefur jafnframt framkallað óvænta sigurvegara. Árið 1996 vann Oliver Panis á Liger kappaksturinn eftir að fremstu menn, þeir Daimon Hill, Jacques Villeneuve og Damon Hill, höfðu fallið úr leik. Rigning getur jafnframt hrist hressilega upp í röðinni og skapað gríðar skemmtilega keppni.

DRS svæði: Á ráskaflanum öllum.

Dekkjagerðir í boði: Super-mjúk (option) og mjúk (prime)

Efstu þrír árið 2011:

1. Sebastian Vettel - Red Bull

2. Fernando Alonso - Ferrari

3. Jenson Button - McLaren

Allt mótið er í beinni útsendingu á Stöð 2 Sport.

Fimmtudagur:

08:00 Æfing 1

12:00 Æfing 2

Laugardagur:

08:55 Æfing 3

11:50 Tímataka

Sunnudagur:

11:40 Mónakó kappaksturinn

Staðan í titilbaráttunni eftir fjórar umferðir

Ökumenn

1. Sebastian Vettel - 61 stig

2. Fernando Alonso - 61

3. Lewis Hamilton - 53

4. Kimi Raikkönen - 49

5. Mark Webber - 48

6. Jenson Button - 45

7. Nico Rosberg - 41

8. Roman Grosjean - 35

9. Pastor Maldonado - 29

10. Sergio Perez - 22

Bílasmiðir

1. Red Bull - 109 stig

2. McLaren - 98

3. Lotus - 84

4. Ferrari - 63

5. Mercedes - 43