Maldonado segist skilja Pirelli dekkin

Pastor Maldonado sem ekur Williams Renault í Formúlu 1 segist nú skilja hvernig Pirelli-dekkin virka. Hann er því fyrstur til að átta sig á virkni dekkjanna.

Öll liðin og ökumenn hafa kvartað undan því að dekkin sem Pirelli skaffar þeim í ár eru óútreiknanleg og varla Formúlu 1 bjóðandi. Aðrir segja að dekkin hafi gert kappaksturinn frábæran.

"Ég held ég skilji dekkin mjög vel," sagði Maldonado. "Mikið betur en í fyrra. Jafnvel þó þeim hafi verið breytt þá líður mér loksins vel með þau undir bílnum."

Til að útskýra það nánar hvað hann meinar með því að hann skilji dekkin segir hann vita nákvæmlega hvernig hann á að sjá til þess að hann gangi ekki frá þeim. "Ég veit upp á hár hvernig ég á að nota þau heilan kappakstur og hvernig ég fæ þau til að lifa lengur. Ég er alltaf að reyna að bæta mig en ég held að blandan af mér, bílnum og dekkjunum sé góð."

Maldonado vann kappaksturinn á Spáni í ár og átti góða möguleika á stigasæti í Valencia núna síðast. Hann eyðilagði hins vegar fyrir sér með því að aka inn í hliðina á Lewis Hamilton, sem hafði slátrað dekkjunum undir lok keppni.