HB Grandi segist tapa yfir þremur milljörðum á veiðileyfagjaldinu

Tekjur af rekstri HB Granda námu 93,3 milljónum evra, eða rúmum 14 milljörðum króna, á fyrri hluta ársins en voru 76,3 milljónir evra árið áður. Hagnaður fyrir fjármagnsliði og afskriftir, eða EBITDA, var 28,7 milljónir evra, eða um 4,4 milljarðar króna, en var 25,2 milljónir árið áður. Bættur árangur er fyrst og fremst skýrður með góðri afkomu loðnuvertíðar. Tap tímabilsins nemur hins vegar 1,5 milljónum evra. Tapið skýrist einkum af gjaldfærslu vegna virðisrýrnunar aflaheimilda upp á 21,6 milljónir evra, eða um 3,4 milljarða króna. Árið áður var hagnaður 15,7 milljónir evra, eða 2,4 milljarða króna, eftir því sem fram kemur í tilkynningu félagsins til Kauphallarinnar.

Í tilkynningunni er bent á að Alþingi samþykkti í lok júní síðastliðnum ný lög um veiðigjöld sem fela í sér að veiðigjöld HB Granda hf. rúmlega fjórfaldast frá síðasta fiskveiðiári. Miðað við forsendur laganna nema áætluð veiðigjöld til greiðslu vegna fiskveiðiársins 2012/2013 2,0 milljörðum króna. Eftir það er gert ráð fyrir stighækkandi sérstöku veiðigjaldi þar til veiðigjöldin á fiskveiðiárinu 2016/2017 ná 65% af sérstaklega reiknaðri rentu allra sjávarútvegsfyrirtækja samanlagt byggt á almanaksárinu 2014. Segir að veruleg hækkun á veiðigjöldum félagsins lækki rekstrarvirði þess.

HB Grandi segir að virðisrýrnunarpróf hafi verið framkvæmt á aflaheimildum í lok júní síðastliðins með því að reikna endurheimtanlegt virði þeirra.  Niðurstaða virðisrýrnunarprófs sýnir að rekstrarvirði félagsins lækki um 136 milljón evrur ( eða um 22,3 milljarða króna). Það er úr 397 milljón evrum í 260 milljónir evra á fyrri hluta ársins sem skýrist af hækkun á veiðigjaldi.  Í árslok 2011 var reiknað virði eigna félagsins talsvert umfram bókfært verð þeirra eða sem nemur 143 milljón evrum.

HB Grandi segir að eingöngu keyptar aflaheimildir félagsins séu færðar til eignar. Bókfærðar aflaheimildir í uppsjávarfiski hafi ekki rýrnað í virði, en bókfærðar aflaheimildir botnfisks hafa orðið fyrir 3,5 milljarða króna virðisrýrnun.

Tilkynning HB Granda til Kauphallarinnar.