Nettóskuldir þjóðarbúsins jukust um 177 milljarða

Að frátöldum innlánsstofnunum í slitameðferð námu eignir þjóðarbúsins 2.583 milljörðum kr. í lok annars ársfjórðungs ársins. Skuldir námu 3.639 milljörðum kr. og var hrein staða því neikvæð um 1.056 milljarða kr. Nettóskuldir þjóðarbúsins hækkuðu um 177 milljarða kr. á milli ársfjórðunga. Þetta kemur fram á vefsíðu Seðlabankans.

Ef innlánsstofnanir eru teknar með námu erlendar eignir þjóðarbúsins 4.215 milljörðum kr. í lok ársfjórðungsins en skuldir 13.505 milljörðum kr. Hrein staða við útlönd var því neikvæð um 9.290 milljarða kr. á þennan mælikvarða.

Á vefsíðunni segir að viðskiptajöfnuður mældist óhagstæður um 49,6 milljarða kr. á ársfjórðungnum samanborið við 47,1 milljarða kr. fjórðunginn á undan. Afgangur af vöruskiptum við útlönd var 12,8 milljarðar kr. og 12 milljarðar kr. á þjónustuviðskiptum.

Jöfnuður þáttatekna var hinsvegar neikvæður um 74,4 milljarða kr. Viðskiptajöfnuður án áhrifa innlánsstofnana í slitameðferð var óhagstæður um 14 milljarða kr. samanborið við 16,7 milljarða kr. fjórðunginn á undan.

Halli á þáttatekjum er eins og áður að miklu leyti vegna innlánsstofnana í slitameðferð. Reiknuð gjöld vegna þeirra námu 28,7 milljörðum kr. og tekjur voru neikvæðar um 7 milljarða kr. Neikvæðar tekjur má rekja til neikvæðrar endurfjárfestingar í erlendum félögum en tap varð á rekstrinum á fjórðungnum.

Neikvæð áhrif innlánsstofnana í slitameðferð á þáttatekjujöfnuð nema 35,7 milljörðum kr. Jöfnuður þáttatekna án áhrifa þeirra er því óhagstæður um 38,7 milljarða kr.