Essien: Kallar Mourinho pabba

Chelsea hefur lánað Michael Essien til Real Madrid og Essien hittir þar fyrir Jose Mourinho sem keypti hann einmitt til Chelsea fyrir sjö árum síðan. Essien fagnar því að spila aftur fyrir Mourinho sem hann lítur á sem föður.

„Þetta gerðist allt mjög hratt. Ég var bara í hótelherberginu mínu þegar ég fékk símtal frá pabba og hann sagði mér að hann vildi fá mig til sín," sagði Michael Essien um símtalið frá Jose Mourinho.

„Ég hef verið að glíma við öll þessi meiðsli en ég er kominn í gott form núna og líður vel. Ef ég væri ekki klár þá hefði Real Madrid ekki viljað fá mig," sagði Essien.

„Pabbi þekkir mig mjög vel. Hann fékk mig til Chelsea á sínum tíma og hann veit manna best að ég get spilað allar stöður á vellinum fyrir utan kannski í markinu," sagði Essien kátur með félagsskiptin á Santiago Bernabeu.