Lewis Hamilton á ráspól í Singapúr

McLaren-ökuþórinn Lewis Hamilton ræsir fremstur í singapúrska kappakstrinum á morgun. Hann ók hraðast um götubrautina í Singapúr í tímatökum í dag. Pastor Maldonado á Williams var næst fljótastur.

"Brautin er mjög erfið," sagði Hamilton eftir tímatökurnar. "Ég var mjög ánægður með að hafa nýtt dekkin nógu vel til að setja bílinn á ráspól."

Það dró til tíðinda þegar heimsmeistarinn Sebastian Vettel á Red Bull náði aðeins þriðja besta tíma, hálfri sekúntu á eftir Hamilton, og 0,1 á eftir Maldonado. Aðeins til að undirstrika frábæra frammistöðu Maldonado þá skákaði hann einnig Fernando Alonso á Ferrari og Jenson Button á McLaren.

Vettel ók hraðast um brautina í öllum æfingum helgarinnar. Strax í fyrstu lotunni var ljóst að hann yrði mjög sterkur í tímatökunni og að Hamilton væri sá eini sem mundi geta veitt honum alvarlega samkeppni.

Liðstjórar þurftu að taka erfiðar ákvarðanir enda var tímatakan sérstök að því leiti að brautin varð hraðari og hraðari með hverjum hring sem ökumenn fóru. Dekkjaval og tímasetningar skiptu því gríðarlegu máli ef hámarka átti möguleika liðsins.

Kimi Raikkönen á Lotus komst ekki í síðustu lotu tímatökunnar og ræsir tólfti. Liðsfélagi hans, Romain Grosjean, snýr aftur eftir að hafa verið bannað að keppa í síðasta móti. Hann ræsir áttundi.

Mercedes-ökuþórarnir tveir, Michael Schumacher og Nico Rosberg, ræsa í níunda og tíunda sæti. Hvorugur setti tíma í síðustu lotunni. Það er að öllum líkindum til þess að hámarka möguleikana í keppninni sjálfri enda hafa Mercedes-bílarnir farið illa með dekkin í mótum ársins.

Felipe Massa komst ekki upp úr annari lotu tímatökunnar. Hann er undir gríðarlegri pressu frá Ferrari-liðinu og Fernando Alonso, liðsfélaga sínum. Massa ræsir í 13. sæti í kappakstrinum á morgun en hann var öryggið uppmálað þegar rætt var við hann áður en hann steig upp í bílinn.

	Ökuþór	Bíll / Vél	Tími	Bil
1	Lewis Hamilton	McLaren/Mercedes	1'46.362	-
2	Pastor Maldonado	Williams/Renault	1'46.804	0.442
3	Sebastian Vettel	Red Bull/Renault	1'46.905	0.543
4	Jenson Button	McLaren/Mercedes	1'46.939	0.577
5	Fernando Alonso	Ferrari	1'47.216	0.854
6	Paul Di Resta	Force India/Mercedes	1'47.241	0.879
7	Mark Webber	Red Bull/Renault	1'47.475	1.113
8	Romain Grosjean	Lotus/Renault	1'47.788	1.426
9	M.Schumacher	Mercedes	-	-
10	Nico Rosberg	Mercedes	-	-
11	Nico Hülkenberg	Force India/Mercedes	1'47.975	1.613
12	Kimi Räikkönen	Lotus/Renault	1'48.261	1.899
13	Felipe Massa	Ferrari	1'48.344	1.982
14	Sergio Pérez	Sauber/Ferrari	1'48.505	2.143
15	Daniel Ricciardo	Toro Rosso/Ferrari	1'48.774	2.412
16	Jean-Eric Vergne	Toro Rosso/Ferrari	1'48.849	2.487
17	Bruno Senna	Williams/Renault	-	-
18	Kamui Kobayashi	Sauber/Ferrari	1'49.933	3.571
19	Vitaly Petrov	Caterham/Renault	1'50.846	4.484
20	H.Kovalainen	Caterham/Renault	1'51.137	4.775
21	Timo Glock	Marussia/Cosworth	1'51.370	5.008
22	Charles Pic	Marussia/Cosworth	1'51.762	5.4
23	N.Karthikeyan	HRT/Cosworth	1'52.372	6.01
24	Pedro de la Rosa	HRT/Cosworth	1'53.355	6.993