Schumacher leggur stýrið á hilluna

Ökuþórinn Michael Schumacher hefur tilkynnt að hann muni leggja stýrið á hilluna í enda tímabilsins. Það verður í annað sinn sem Schumi hættir og að þessu sinni er ákvörðunin endanleg.

Hinn sjöfaldi heimsmeistari var búinn að missa sæti sitt í Mercedes-liðinu til Lewis Hamilton en samt áttu margir von á því að hann myndi finna sér nýtt lið.

"Ég hef ákveðið að hætta í enda ársins. Þó svo ég telji mig enn geta keppt á toppnum kemur alltaf að því að maður verði að kveðja. Að þessu sinni er kveðjan væntanlega endanleg," sagði Þjóðverjinn á blaðamannafundi.

"Síðasta mánuðinn var ég ekki viss um hvort ég hefði enn áhugann og orkuna sem er nauðsynleg til þess að halda áfram. Ég er ekki maður sem geri hlutina nema ég ætli að gera þá 100 prósent."

Schumacher hætti fyrst árið 2006 en þá sagðist hann ekki lengur hafa orkuna til þess að keppa. Honum leiddist þó þofið á endanum og snéri til baka þrem árum síðar.

Schumacher hefur ekki náð sömu hæðum eftir að hann snéri til baka en hver veit hvað hann gerir í síðustu sex kappökstrunum sem hann á eftir.