Kobe stappar stálinu í A-Rod

Hafnaboltaleikmaðurinn Alex Rodriguez hjá NY Yankees er ein skærasta stjarnan í bandarísku íþróttalífi og einn launahæsti íþróttamaður heims.

Þó svo hann sé einn af bestu leikmönnum MLB-deildarinnar þá á hann sína slæmu tíma. Lítið hefur gengið hjá honum upp á síðkastið og svo slakur hefur hann verið að Yankees er búið að henda honum á bekkinn í miðri úrslitakeppni.

Einn besti vinur hans er körfuboltakappinn Kobe Bryant hjá LA Lakers en þeir kynntust við gerð auglýsingar fyrir nokkrum árum síðan.

Kobe hefur áhyggjur af vini sínum og hefur verið að stappa í hann stálinu.

"Ég sagði bara við hann. Þú ert Alex Rodriguez, A-Rod. Einn sá besti sem hefur spilað leikinn," sagði Kobe um peppræðuna sína.

"Hann gleymir því stundum hversu góður hann er. Hann verður að lemja sig áfram og ég er viss um að hann hrekkur í gang þegar hann fær aftur tækifæri," sagði Kobe sem er vinur í raun.