Red Bull-bílarnir fljótastir á æfingum í Kóreu

Þeir Sebastian Vettel og Mark Webber hjá Red Bull í Formúlu 1 voru lang fljótastir á seinni æfingum keppnisliða fyrir kóreska kappaksturinn sem fram fór í nótt. Þeir óku þremur hundruðustu úr sekúntu hraðar en Fernando Alonso á Ferrari.

Vettel hefur unnið síðustu tvö mót í heimsmeistarabaráttunni, í Singapúr og Japan, og er nú aðeins fjórum stigum á eftir Fernando Alonso þegar fimm keppnir eru eftir.

Ætla má að tímatökuhraði Red Bull-liðsins sé ógnarmikill en óvíst er hversu mikið sá hraði mun smita keppnishraðann.

Lewis Hamilton á McLaren var fljótastur á fyrri æfingunni en þar fóru Red Bull ekki of geyst og voru í þriðja og fimmta sæti, tæpri sekúntu á eftir Hamilton. Alonso er sem fyrr stöðugastur milli æfinga og var næst fljótastur.

Hamilton var hins vegar horfinn í áttunda sætið þegar seinni æfingunum lauk. Liðsfélagi hans Jenson Button varð fjórði á undan Michael Schumacher á Mercedes.

Ný útfærsla af útblásturskerfi Lotus-bílanna virðist ekki vera að skila tilsettum árangri, þó enn sé of snemmt að dæma til um það. Kimi Raikkönen og liðfélagi hans Romain Grosjean röðuðu sér í tíunda og ellefta sætið á seinni æfingunni, á eftir öllum sínum helstu keppinautum.

Sauber-liðið virðist ekki ná að halda í við sína keppinauta í Kóreu en á báðum æfingunum voru Kamui Kobayashi og Sergio Perez í fjórtánda og fimmtánda sæti, á eftir Force India og Mercedes. Yfirmenn Sauber-liðsins voru stóryrtir fyrir helgi og sögðust ætla að skáka þessum liðum í mótunum fimm sem eftir eru.