Galaxy S III er snjallsími ársins

Tævanski raftækjaframleiðandinn ASUS vann til fimm verðlauna á T3 tæknihátíðinni sem fór fram í Lundúnum í vikunni. Fulltrúar frá öllum helstu tæknifyrirtækjum veraldar voru viðstaddir afhendingu verðlaunanna.

Meðal annars hreppti ASUS verðlaun fyrir raftæki ársins og það fyrir Google Nexus 7 spjaldtölvuna — hún var einnig valin spjaldtölva ársins.

T3 er tækniráðstefna þar sem helstu frumkvöðlar á sviði tækni og nýsköpunar eru heiðraðir.

Það vakti mikla athygli að tæknirisarnir tveir, Apple og Samsung, unnu aðeins ein verðlaun hvor. Fyrirtækin voru tilnefnd í tíu flokkum.

Flaggskip Samsung, Galaxy S III, sigraði þannig snjallsíma Apple, iPhone 4S, og var hann valinn snjallsími ársins 2012.

Einu verðlaun Apple á hátíðinni voru fyrir vinnutæki ársins en það var iPhone 4S sem sigraði í þeim flokki.