David Villa: Ég vil fá að spila

David Villa var orðinn óþolinmóður að fá ekki að spila meira með Barcelona-liðinu en Villa hefur lengstum verið aukaleikari hjá liðinu eftir að hann snéri til baka eftir fótbrot.

David Villa var í byrjunarliðinu í gær í 3-0 bikarsigri á Alaves og skoraði eitt marka liðsins. Hann skoraði einnig í 5-0 sigri á Rayo Vallecano um síðustu helgi og er búinn að skora 5 mörk í 8 leikjum á tímabilinu.

„Eins og allir fótboltamenn þá vil ég fá að spila eins mikið og ég get," sagði David Villa á heimasíðu Barcelona.

„Ég spila með besta liði í heimi og það er rosaleg samkeppni um sæti í liðinu. Við spilum hinsvegar marga leiki og erum í mörgum keppnum. Þjálfarinn veit af mér og það er annar leikur á laugardaginn," sagði David Villa.

„Ég er ánægður með stöðuna á mér. Ég er að komast í mitt besta form sem er hið besta mál. Mér líður vel á vellinum," sagði Villa.