Stórmeistarajafntefli hjá FC Bayern og Dortmund

FC Bayern og Borussia Dortmund skildu jöfn 1-1 í stórslag helgarinnar í efstu deild þýsku knattspyrnunnar en leikið var í München í dag. Heimamenn hafa átta stiga forskot á Leverkusen á toppi deildarinnar.

Eftir markalausan fyrri hálfleik kom Tony Kroos Bæjurum yfir með fallegu skoti með vinstri fæti fyrir utan teig. Heimamenn höfðu ellefu stiga forskot á Dortmund fyrir leikinn og sigur hefði líklega gert endanlega úti um vonir Dortmund um að verja meistaratitil sinn.

Mario Götze jafnaði hins vegar metin sjö mínútum síðar með fínu marki og tryggði gestunum eitt stig.

FC Bayern hefur átta stiga forskot á Leverkusen í toppsæti deildarinnar. Dortmund er í þriðja sæti ellefu stigum á eftir forystusauðunum.