Enginn bilbugur á norðanmönnum

Þótt blikur séu á lofti í stangaveiðiheiminum segist formaður Stangaveiðifélags Akureyrar síður en svo eiga von á samdrætti í sölu á svæðum félagsins.

"Við erum eingöngu með silungsveiðiár á okkar höndum og á ég nú ekki von á að samdráttur verði í þeim ám nema síður sé. Tel ekki ólíklegt að laxveiðimenn munu að einhverju leyti leita meira í silunginn þar sem mér sýnist að dýrtíðin ætli að halda áfram í flestum laxveiðiám landslins," segir Guðrún Una Jónsdóttir, formaður Stangaveiðifélags Akureyrar.

SVAK er að byrja að undirbúa forsölu í Ólafsfjarðará sem félagið er með á leigu ásamt Veiðifélaginu Flugunni. Guðrún Una segir forsöluna munu hefjast í lok janúar eða byrjun febrúar.

"Við sögðum Hofsá í Skagafirði upp í nóvember síðastliðinn þannig hún verður ekki á okkar vegum næsta sumar. Aðrar fastar ár í umboðssölu hjá okkur munu svo detta inn þegar líður á veturinn en þar má til dæmis nefna Hörgá, Svarfaðardalsá og Fjarðará í Hvalvatnsfirði. Reikna einnig með að Laxá á Hrauni og Syðra-Fjalli og Norðurá í Skagafirði verði á söluvef SVAK," segir Guðrún Una.

Þá segir Guðrún Una undirbúning fyrir vetrarstarfið á fullu. Það sé í samstarfi við veiðifélögin Fluguna og Flúðir. "Stefnan er sett á að hafa uppákomur á hverju mánudagskvöldi í vetur og munum við byrja í lok janúar," segir hún.

SVAK verður tíu ára í byrjun maí. "Við ætlum við að minna á okkur reglulega í vetur í því sambandi. Það er því nokkuð gott hljóð í okkur Norðanmönnum og ekki laust við að jólaskapið sé farið að láta á sér kræla. Á óskalistanum fyrir jólin er svo auðvitað bara veiðidót. Vona að ættingjarnir klikki ekki á því," undirstrikar formaður Stangaveiðifélags Akureyrar.

gar@frettabladid.is