Messi með 91. markið í sigri Barcelona

Lionel Messi skoraði sitt 91. mark á árinu 2012 þegar Barcelona vann 3-1 útisigur á Real Valladolid í spænsku úrvalsdeildinni í knattspyrnu.

Messi skaut í stöngina úr aukaspyrnu í fyrri hálfleik áður en gestirnir frá Katalóníu komust yfir. Jordi Alba sendi þá fyrir markið frá vinstri á Xavi sem skoraði af stuttu færi. Markið kom á markamínútunni, þeirri 43., og staðan 0-1 í hálfleik.

Messi skaut framhjá með hægri úr dauðafæri áður en hann komst á blað. Argentínumaðurinn fékk þá boltann frá Xavi, klobbaði einn liðsmann Valladolid áður en hann sendi boltann með góðu skoti af stönginni og inn.

Heimamenn minnkuðu muninn mínútu fyrir leikslok en Cristian Tello gulltryggði sigur Barcelona þegar hann prjónaði sig í gegnum vörn heimamanna í viðbótartíma.