Jóhann Berg leggur skóna á hilluna

Jóhann Berg á 18 ára atvinnumannaferil að baki þar sem hann lék lengst af á Englandi. Hann lék yfir 100 landsleiki fyrir Íslands hönd og fór með liðinu á bæði EM 2016 og HM 2018.

Jóhann Berg hafði verið án liðs síðan í febrúar og óvissa verið um framtíð hans í sportinu síðustu mánuði.

„Auðvitað er þetta búinn að vera langur fótboltaferill. Verð 36 ára í október og maður er orðinn eldgamall í þessu sporti. Þetta er búinn að vera frábær ferill en það er ekkert útilokað eins og er,“ sagði Jóhann í Bítinu á Bylgjunni í ágúst síðastliðnum.

„Á þessum tímapunkti þarf þetta að vera nógu spennandi til að maður vilji þetta. Maður getur ekki verið 80 prósent í fótbolta. Ég þarf að vilja gera þetta almennilega. Eins og er hefur það ekki komið upp en við sjáum til hvað gerist,“ sagði Jóhann enn fremur fyrir tæpum tveimur mánuðum síðan.

Fótboltinn gefið allt

Nú eru skórnir hins vegar komnir upp í hillu.

„Eftir meira en 18 ára feril sem atvinnumaður er kominn tími á að ég leggi skóna á hilluna,“ skrifar Jóhann Berg í færslu á Instagram.

„Fótbolti hefur gefið mér allt,“ er á meðal þess sem segir einnig í færslunni.

Jóhann Berg spilaði sína fyrstu meistaraflokksleiki fyrir Breiðablik hér á landi en hann hafði fyrir það verið í akademíum Chelsea og Fulham á Englandi. Hann hóf að leika með Breiðabliki sumarið 2008 og sló strax í gegn.

Hann fór þaðan til AZ Alkmaar í Hollandi hvar hann var í fimm ár áður en leiðin lá til Lundúna á ný er hann samdi við Charlton Athletic. Lengst af var hann leikmaður Burnley milli 2016 og 2024 þar sem hann lék 200 deildarleiki.

Hann lék í kjölfarið eitt ár í Sádi-Arabíu og annað í Sameinuðu arabísku furstadæmunum. Samningur hans í síðastanefnda ríkinu var slitið í febrúar og var Jóhann orðaður við lið hér heima.

Eftir tæpa átta mánuði án liðs hefur hann hins vegar tekið þá ákvörðun að binda enda á leikmannaferilinn.

Jóhann Berg spilaði 102 landsleiki fyrir Íslands og skoraði í þeim átta mörk, þar af fræg þrjú mörk í 4-4 jafntefli við Sviss í Bern árið 2013. Síðasti landsleikur Jóhanns Berg var við Mexíkó ytra snemma á þessu ári.