Furðuheimur vex á Heljarþröm

Höður og Baldur, fyrsta bókin í skáldsagnaþríleiknum Saga eftirlifenda, kom út árið 2010. Þetta var jafnframt fyrsta skáldsaga Emils Hjörvars Petersen, sem leitaði í rann norrænnar goðafræði að yrkisefni. Höður og Baldur eru í hópi ásanna sem lifa af Ragnarök og þurfa að fóta sig í nýjum heimi. Fleiri persónur úr norrænni goðafræði koma við sögu, svo sem Váli, Víðar, Móði og Magni. Nú er komin út önnur bókin í þríleiknum, þar sem höfundurinn tekur upp þráðinn þar sem frá var horfið. Emil Hjörvar er bókmenntafræðingur að mennt og hefur ávallt haft mikinn áhuga á furðusögum, vísindaskáldskap, einkum borgarfantasíum og heimsendabókmenntum. "Í háskólanum voru hins vegar fáir kúrsar í boði sem fjölluðu um þessar bókmenntagreinar þannig að ég hef bara lesið þær sjálfur en í meistaranáminu í Svíþjóð gat ég síðan sérhæft mig í fantasíufræðum.“ Áhætta sem borgaði sig En hvort kviknaði á undan, hugmyndin að skrifa furðusögu eða verk byggt á goðafræðinni? "Ég hafði gengið með þessa hugmynd lengi að skrifa sögu út frá Heði, blinda ásnum, en þegar til kastanna kom gerði ég mér grein fyrir að hún myndi ekki virka nema sem furðusaga. Og ólíkt flestum íslenskum furðusögum ákvað ég að hún ætti að vera fyrir fullorðna. Sáralítill markaður hefur verið fyrir slíkar bækur hér á landi en það hefur smám saman verið að breytast.“ Verkið óx fljótlega í höndunum á Emil. "Fljótlega eftir að að ég var byrjaður á fyrstu bókinni gerði ég mér grein fyrir að þetta var mun stærri saga en rúmaðist í einni bók og ákvað því að skrifa þríleik. Það var því ekki nóg með það að ég væri að skrifa furðusögu fyrir fullorðna heldur kynnti ég hana sem fyrstu bókina af þremur, sem var talsverð áhætta.“ Sú áhætta hefur borgað sig að mati Emils; Höður og Baldur fékk góðar viðtökur bæði gagnrýnenda og hefur selst vel. "Miðað við fyrstu skáldsögu get ég mjög vel við unað og mér skilst að á bókasöfnum sé hún nánast alltaf í útláni. Framhaldsskólar hafa líka tekið bókina inn í kennslu meðfram norrænu goðafræðinni.Ég var til dæmis í Menntaskólanum við Sund um daginn, þar sem bókin er lesin í öllum bekkjum á öðru ári, að ræða við nemendur og hún virtist mælast vel fyrir.“ Vildi auka hlut kvenna Heljarþröm er beint framhald Haðar og Baldurs, þar sem Emil þróar persónur og heim bókarinnar enn frekar. "Allt sem var nefnt og lagt fyrir í fyrri bókinni er tekið lengra og kafað dýpra. Ég endaði bókina á svokölluðum "cliffhanger“ þar sem Baldur vaknar í framandi framtíðarheimi og Heljarþröm tekur upp þráðinn þar sem frá var horfið. Bókin er lengri og massívari og fer með furðusagnagreinarnar mun lengra en fyrsta bókin. Hún gerist til dæmis á tveimur tímaskeiðum; á því síðara, þar sem Baldur vaknar, hefur siðmenning manna hrunið og það eru byrjuð að rísa borgríki inni í rústum höfuðborga heimsins sem kallast nú öðrum nöfnum. Það er þannig nýr furðusagnaheimur farinn að byggjast á okkar veruleika.“ Eitt af því sem Emil segir hafa vakað fyrir sér í Heljarþröm var að efla hlut kvenpersóna í sögunni. "Í fyrri bókinni stóð ég frammi fyrir þessu mikla karlaveldi ásanna og þurfti að finna leiðir til að auka hlut kvenna. Ég geri mikið úr hinni mennsku Líf, sem lifir af Ragnarrök samkvæmt Völuspá, en svo vek ég upp aðrar persónur eins og veiðigyðjuna Skaða sem er mjög sterkur karakter í seinni bókinni. Það má segja að í Heði og Baldri séu konur undirokaðar af karlmönnum en í Heljarþröm fá þær uppreisn æru ef svo má segja, sem var mjög meðvitað af minni hálfu.“ Á erlendar ráðstefnur Saga eftirlifenda hefur ekki aðeins vakið athygli á Íslandi. Emil býr í Svíþjóð og var nýlega einn af gestahöfundum á helstu furðu- og vísindasagnaskáldsagnaráðstefnu þar í landi, sem haldin var í Uppsölum. "Þar tók ég þátt í pallborðsumræðum með sænskum furðusagnahöfundum, þar á meðal höfundum Hringsins sem er nýkomin út á Íslandi, og breska höfundinum Joe Abercrombie, sem var heiðursgestur. Ég hélt líka fyrirlestur um norræna goðafræði í furðusögu og mín eigin verk og var vel tekið. Í mars er ég svo á leiðinni á The International Conference on the Fantastic in the Arts í Flórída, þar sem mér er meðal annars boðið að lesa upp úr verkum mínum sem er frekar "kúl“. En þýðir það að Saga eftirlifenda sé væntanleg á fleiri tungumál? "Það er mikill áhugi fyrir því og ég hef átt í viðræðum við útgefendur um það. Svo það er allt í vinnslu.“