Óska eftir tilboðum í Eldvatn

Veiðifélag Eldvatns í Meðallandi í Vestur-Skaftafellsskýslu hefur óskað eftir tilboðum í silungsveiði í Eldvatni. Þetta kemur fram kemur á vef Landssambands veiðifélaga - angling.is.

Óskaðir er eftir tilboðum í veiðina frá og með árinu 2013 til og með 2019. Í Eldvatni, sem er um 20 kílómetrum frá Kirkjubæjarklaustri, er veitt á sex stangir frá 1. apríl til 10. október og er eingöngu heimil fluguveiði. Tilboðin verða opnuð laugardaginn 26. janúar í veiðihúsi Eldvatns.

Vatnasvæði Eldvatns er um 20 kílómetra langt með um 40 merktum veiðistöðum. Líkt og mörg önnur svæði í Vestur-Skaftafellssýslu, er Eldvatn þekkt fyrir vænan sjóbirting þó einnig veiðist lax og bleikja á svæðinu. Þess má geta að Steinsmýrarvötn tengjast Eldvatni með skurði og Eldvatnsbotnar eru efsti hlut árinnar.

Pétur Pétursson, oft kenndur við Vatnsdalsá, var í samstarfi við veiðiréttareigendur Eldvatns þar til síðasta vetur þegar hann sagði sig frá samningnum eins og það var orðað í frétt Vatna og veiði í mars á síðasta ári.

trausti@frettabladid.is