Leiguverð á ýsukvóta hefur aldrei verið hærra

Leiguverð á ýsukvóta er komið upp í 315 krónur kílóið, sem er lang hæsta leiguverð á ýsu til þessa og langt yfir því sem fæst fyrir ýsuna á fiskmarkaði.

Þannig var kílóið af ýsu selt á 244 krónur á mörkuðum í gær, eða á 70 krónum lægra verði en greitt er í leigu fyrir kílóið.

Þetta skýrir með óyggjandi hætti þann mikla vanda sem margar útgerðir eru komnar í, vegna skorts á ýsukvóta, en óvenju mikið veiðist af ýsu, þegar útgerðir eru að reyna að veiða þorskkvóta sína.

Stjórnvöld hafa ekki ljáð máls á að auka ýsukvótann. Sáralítið framboð er líka á leigukvóta og stefnir nú í að einhverjar útgerðir verði að hætta þorskveiðum vegna þessa.