Kröfðust gjaldþrotaskipta yfir DV

Sameinaði lífeyrissjóðurinn krafðist gjaldþrotaskipta yfir útgáfufélagi DV á dögunum. Viðskiptablaðið greinir frá því í dag að þessi krafa hafi verið vegna 600 þúsund króna skuld blaðsins við sjóðinn. Gjaldþrotabeiðnin var þó afturkölluð á síðustu stundu þegar skuldin var greidd upp. Vísir hefur á undanförnum þremur vikum ítrekað óskað eftir upplýsingum frá Kristjáni Erni Sigurðssyni, framkvæmdastjóra Sameinaða lífeyrissjóðsins en án árangurs.

DV skuldar tollstjóra umtalsverðar upphæðir og iðgjöld í Lífeyrissjóð verzlunarmanna. Fram kemur í Viðskiptablaðinu að samþykkt var í stjórn útgáfufélags DV í gær að auka hlutafé félagsins um 40 milljónir til að greiða niður skuldir.