Vettel vonsvikinn með síðustu æfingadagana

Heimsmeistarinn Sebastian Vettel segir liðið sitt ekki hafa náð öllum markmiðum sínum á æfingum vetrarnins sem lauk í gær. Dekkin hafi verið of stór þáttur til þess að geta metið bílinn með einhverri vissu.

Dekkin hafa verið öllum liðunum til vandræða undirbúningstímabilinu því þau eyðast hratt og eru orðin léleg eftir fáeina hringi. Vettel bendir á að þetta setji alla í þá stöðu að vita ekki upp á hár hvers konar tól liðin hafa til umráða fyrir keppnistímabilið.

"Við verðum bara að passa okkur sjálfa," sagði heimsmeistarinn við Autosport í Barcelona í gær. "Við náðum ekki að haka í öll boxin á listanum okkar og síðustu tveir dagar æfinganna gengu ekki eins og við vonuðumst til."

Hann er þó vongóður og segir enn tíma til stefnu áður en keppnisvertíðin hefst í Melbourne í Ástralíu síðar í þessum mánuði. Hann segist þó ekki geta bent á einstaka hluti sem þurfi að lagfæra. "Það er ofboðslega erfitt að vita hvar við eigum að bæta bílinn því dekkin hafa ekki verið nógu áreiðanleg."

"Ef við lítum yfir allar þrjár æfingaloturnar þá höfum við í öll skiptin þurft að takmarka okkur við líftíma dekkjanna. Það var því ógeðslega erfitt að stilla bílnum upp og marka stefnu í þeim efnum því dekkin eru ekki nógu góð."

Nico Rosberg var fljótastur á síðasta degi æfinganna en liðsfélagi hans var fljótastur á laugardag. Vettel er samt viss um að það verði ekki endilega raunin í keppnum ársins því aðstæðurnar eru of flóknar til að lesa í bestu tíma. "Við fylgdumst með hringtímunum en það er óljóst að svo búnu hvaða dekk það eru sem gefa manni bestu spyrnuna."