Pétur Már verður ekki áfram með KFÍ

Pétur Már Sigurðsson, þjálfari meistaraflokks KFÍ og yfirþjálfari yngri flokka félagsins, verður ekki áfram í starfi á Ísafirði en þetta kemur fram á heimasíðu KFÍ.

Stjórn Körfuknattleiksfélags Ísafjarðar og Pétur Már hafa komist að samkomulagi um að endurnýja ekki samstarfssamning sín á milli en samningurinn rennur út í lok apríl en hann hefur þjálfað Ísafjarðarliðið undanfarin tvö ár.

Síðasta verk Péturs með meistaraflokk KFÍ var að stýra liðinu til sigurs í lokaumferðinni á móti KR en sá sigur bjargaði liðinu frá falli.

Stjórn og yfirþjálfari voru samkvæmt frétt á heimasíðu KFÍ samstíga í því að tilkynna þessar fyrirhuguðu breytingar með góðum fyrirvara þar sem undirbúningur fyrir leiktímabil næsta vetrar er þegar hafinn.