Hólmar spilaði allan leikinn í tapleik

Hólmar Örn Eyjólfsson og félagar hans í Bochum sogast enn nær fallbaráttunni í þýsku B-deildinni í fótbolta eftir að liðið tapaði fyrir Braunschweig í dag, 1-0.

Domi Kumbela skoraði eina mark leiksins á 85. mínútu en Hólmar Örn var í byrjunarliði Bochum og spilaði allan leikinn í vörninni.

Bochum er í fimmtánda og fjórða neðsta sæti deildarinnar með 26 stig. Tvö neðstu liðin falla beint í C-deildina en liðið í þriðja neðsta sæti fer í umspil.

Hólmar Örn, sem var valinn í íslenska landsliðið í gær, hefur verið fastamaður í liði Bochum að undanförnu.