Hamilton: Nú er rétti tíminn til að gerast goðsögn

Lewis Hamilton segist vera ólmur í að vinna fleiri heimsmeistaratitla og stimpla sig endanlega inn sem ökumann sem vert er að minnast í framtíðinni. Hann segir andrúmsloftið hjá Mercedes-liðinu vera tilvalið til þess.

Hamilton yfirgaf McLaren-liðið í vetur eftir 13 ára samstarf. Hann er aðeins 28 ára og er vongóður fyrir keppnistímabilið sem hefst um næstu helgi í Ástralíu. Hann hefur unnið einn heimsmeistaratitil, árið 2008, á hans öðru ári í Formúlu 1.

„Ég er enn hungraður því ég hef ekki gert neitt stórkoslegt! Ég er ekki búinn að vinna allar heimsmeistarakeppnirnar sem ég hef tekið þátt í og ekki öll mótin," sagði Hamilton.

„Andrúmsloftið hjá Mercedes er allt öðruvísi og ég er mjög ánægður með stöðu mína hér. Öll umgjörðin er mér að skapi og ég get breitt út vængina eins og ég vil."

„Markmiðið er að snúa spilinu við fyrir þetta lið og vinna heimsmeistaratitla. Og næstu árin ætla ég að reyna að vinna eins marga titla og ég get. Einn yrði frábær og fleiri myndu verða mun betri."

„Við viljum allir vera númer 1 og ég var það í smá tíma þangað til Sebastian Vettel skákaði mig. Fernando Alonso hefur einnig verið öflugur en ég vil vera á undan báðum. Vettel er jafnvel álitinn jafn frábær og Michael Schumacher. Ég vil ekki vera skráður undir flokknum „aðrir þátttakendur"."

Hamilton skrifaði undir þriggja ára samning við Mercedes-liðið sem talinn er vera 60 milljón punda virði sem jafngildir rúmlega 11 milljörðum íslenskra króna. Hann segist þó ekki vera hræddur við að berjast við fyrrum liðsfélaga sinn hjá McLaren, Jenson Button. Frekar óttast hann ökumann ársins 2012, Fernando Alonso.

„Ég er ekki þannig manneskja sem vill hefna sín á gamla liðinu. En einhverntíma munum við sigra þá á brautinni og það verður örugglega gaman, ekki af því að það eru þeir heldur allir aðrir verða fyrir aftan okkur líka," sagði Hamilton.

„Svo keppnin á milli mín og Button er ekki eitthvað sem ég hef sérstakar áhyggjur af. Ég er meira spenntur fyrir keppni á milli okkar Alonso. Sá er einn af fljótustu ökumönnum í heimi og allir munu eiga í erfiðleikum með hann."

Sex ár verða í sumar liðin frá því að upp úr sauð milli Hamilton og Alonso hjá McLaren. Því einvígi lauk með því að báðir hlutu 109 stig í öðru og þriðja sæti titilbaráttunni. Kimi Raikkönen vann, þá í Ferrari-bíl.