Fjögurra ára að æfa fluguköst

Hann Ari Lár Örvarsson, sem er fjögurra ára, æfði fluguköst af mikilli íþrótt í Laugardalnum í gær ásamt föður sínum Örvari Daða Marinóssyni.

Örvar Daði segir að mikið standi til og því hafi kennslan verið nauðsynleg.

„Við erum að fara með átta og níu ára gutta, syni okkar, norður í land til að opna Arnarvatnsá og Helluvatnsá. Við vorum að nota blíðuna til að kenna handtökin, því í ánum er bara veitt á flugu," segir Örvar. „Sá litli fylgdi með og heimtaði að fá að kasta líka. En það er auðvitað aldrei of snemmt að byrja."

Búið er að fara með guttana í veiðibúðir til að velja vænlegar flugur, leynivopn.

„Dýrbítur varð fyrir valinu. Þetta verður ævintýri hjá þeim því árnar geta gefið ævintýralega urriðaveiði, sérstaklega svona snemma," segir Örvar.

svavar@frettabladid.is