Gullsöfnun í Eindhoven

Jón Margeir Sverrisson setti fimm Íslandsmet og vann til fjögurra gullverðlauna á Swimcup í Eindhoven í Hollandi en mótinu lauk í gær.

Jón Margeir setti fjögur Íslandsmet strax á fyrsta degi í 50 metra flugsundi og 100 metra skriðsundi. Fyrst setti hann metið í undanrásum að morgni og bætti svo met sín í úrslitasundinu síðdegis. Hann hafnaði í 1. sæti í skriðsundinu og 2. sæti í flugsundinu í flokki S14.

Á laugardeginum vann Jón til gullverðlauna í 200 metra skriðsundi en var þó nokkuð frá sínu besta. Hann kom í mark á tímanum 2:06.62 sem er sjö sekúndum frá heimsmetinu sem hann setti á Ólympíumótinu í London í sumar.

Jón Margeir bætti svo tveimur gullverðlaunum í safnið í gær í 400 metra skriðsundi og 50 metra skriðsundi. Í síðari greininni setti hann Íslandsmet í úrslitasundinu þegar hann kom í mark á tímanum 25,30. Hann var 11/100 úr sekúndu á undan Marc Evers, einum af hans helstu keppinautum.

Jón Margeir verður áfram við æfingar ytra með hollenska landsliðinu.