Brasilísk klassík í Vatnsmýrinni

Brasilísku tónlistarmennirnir Gustavo Tavares og Nelson Faria koma fram á tónleikum í Norræna húsinu í kvöld. "Tavares og Faria leika á gítar og selló. Þetta er raunar mjög óvanaleg samsetning hljóðfæra og verður áhugavert að heyra samspilið," segir Nína Margrét Grímsdóttir, skipuleggjandi tónleikanna. Nína segir Tavares og Faria vera í fremstu röð klassískra tónlistarmanna frá Brasilíu. Tavares hafi verið lýst sem "einu mikilvægasta nafni í klassískri tónlist okkar tíma" og Nelson verið nefndur "svar Brasilíu við Joe Pass". "Þeir er því sannarlega mjög góðir gestir. Og þeir ætla að spila bæði frumsamið efni og tónlist eftir þekkt tónskáld. Auk þess eru þeir að kynna nýjan geisladisk sem hefur unnið til verðlauna í Brasilíu." Tónleikarnir eru hluti af tónleikaröð FÍT, Klassík í Vatnsmýrinni, sem er samstarfsverkefni Norræna hússins og félagsins. Verkefnið er einnig styrkt af Reykjavíkurborg, menntamálaráðuneytinu og brasilíska sendiráðinu í Ósló. Þess má geta að geisladiskur tvíeykisins, sem verður einnig til sölu við innganginn, hefur nú þegar verið tilnefndur til helstu hljóðritunarverðlauna í Brasilíu. Hægt er að horfa á stutt kynningarmyndband um gerð hans í spilaranum hér fyrir ofan. Tónleikarnir hefjast klukkan átta.