Þóranna ráðin deildarforseti viðskiptadeildar HR

Dr. Þóranna Jónsdóttir hefur verið ráðin deildarforseti viðskiptadeildar Háskólans í Reykjavík. Þóranna tekur við starfinu  þann 1. maí næstkomandi af Dr. Friðrik Má Baldurssyni sem verður áfram prófessor við deildina.

Í tilkynni ngu segir að Þóranna hafi starfað sem framkvæmdastjóri stjórnunar og rekstrar við Háskólann í Reykjavík frá árinu 2011. Þóranna lauk doktorsprófi frá Cranfield University í Bretlandi árið 2011 og sérhæfði sig í ábyrgð og skyldum stjórnarmanna. Þá er hún einnig með MBA-gráðu frá IESE viðskiptaháskólanum í Barcelona.

Á árunum 2007-2011 starfaði Þóranna sem framkvæmdastjóri hjá Auði Capital og árin 2005-2007 sem framkvæmdastjóri hjá Veritas/Vistor. Þóranna hefur setið í stjórnum ýmissa fyrirtækja, auk þess að veita forstöðu nefnd á vegum Viðskiptaráðs, Kauphallarinnar og Samtaka atvinnulífsins um endurskoðun á „Leiðbeiningum um stjórnarhætti“.