Einn stærsti farmur ársins af frystri loðnu

Flutningaskipið Green Guatemala liggur í höfninni í Neskaupstað og lestar frysta loðnu sem fer til Svartahafsins.  Um er að ræða eina stærstu útskipun ársins en skipið mun taka 5.000 tonn.

Þetta kemur fram á vefsíðu Síldarvinnslunnar. Þar er haft eftir Heimi Ásgeirssyni yfirverkstjóra að lestun gangi vel og fara um 1.000 tonn um borð í skipið á dag.

Í stað loðnunnar sem fer úr frystigeymslum Síldarvinnslunnar kemur frystur kolmunni. Vilhelm Þorsteinsson EA er væntanlegur seinni partinn á morgun með tæplega 600 tonn af frystum kolmunna og á fimmtudag er Hákon EA væntanlegur með um 750 tonn.

Heimir segir að miklar annir séu hjá starfsmönnum frystigeymslnanna um þessar mundir og það sé svo sannarlega nóg að gera framundan.