Abidal gæti fylgt Guardiola til Bayern í sumar

Eric Abidal, leikmaður Barcelona á Spáni sagði í viðtali um helgina að Evrópumeistarar Bayern München hafi áhuga á að fá hann til liðs við sig í sumar.

Samningur Abidal rennur út í sumar en hann hefur verið mikið fjarverandi undanfarin tvö árin þar sem hann greindist með hættulegt æxli. Hann kom með endurkomu undir lok tímabilsins sem var að líða en Barcelona hefur ákveðið að endurnýja ekki samning leikmannsins.

Eins og flestum er kunnugt tekur Pep Guardiola, fyrrverandi knattspyrnustjóri Barcelona við liði Bayern München í sumar og eru taldar miklar líkur á því að hann reyni að næla í Abidal.

„Guardiola veit hvernig staðan á mér er og væri það mikill heiður að ganga í raðir Bayern. En þetta er ekki svo einfalt, stjórnarformenn og framkvæmdarstjóri liðsins hafa líka sitthvað um málið að segja," sagði Abidal að lokum.