Lewandowski fer ekki frá Dortmund í sumar

Forráðamenn þýska liðsins Dortmund hafa útilokað að sóknarmaðurinn Robert Lewandowski fari frá liðinu nú í sumar.

Áður voru þeir búnir að staðfesta að leikmaðurinn yrði ekki seldur til annars þýsks liðs og nú segja þeir það fullvíst að hann verður ekki heldur seldur úr landi.

„Robert mun án nokkurs vafa spila með Borussia Dortmund á næsta tímabili,“ sagði Hans-Joachim Watzke, stjórnarformaður félagsins, við þýska fjölmiðla.

Lewandowski á aðeins eitt ár eftir af samningi sínum og hafði verið sterklega orðaður við Bayern München en einnig Manchester United, Chelsea og Real Madrid. Dortmund er þegar búið að selja Mario Götze til Bayern og ætlar ekki að missa aðra stórstjörnu frá sér í sumar.

Undirbúningstímabilið hjá Dortmund hefst eftir tvær vikur.