Lögreglan lýsir eftir Friðriki sem hvarf í Suður-Ameríku

Lögreglan lýsir eftir Friðriki Kristjánssyni sem hvarf í Suður-Ameríku fyrr á árinu. Ekkert hefur til hans spurst síðan í apríl síðastliðnum.

Friðrik, sem er 30 ára, var þá á ferðalagi um Suður-Ameríku. Lögreglan óskaði eftir aðstoð Interpol í apríl til þess að finna Friðrik og var þá talið að hann væri staddur í Paragvæ eða Brasilíu. Eftirgrennslan bar þó ekki árangur.

Margar sögursagnir hafa verið uppi um afdrif Friðriks, en enginn fótur virðist vera fyrir þeim. Lögreglan verst frétta og segist aðeins lýsa eftir Friðriki og er málið ekki skoðað sem sakamál.

Fréttastofa Stöðvar 2 greindi hinsvegar frá því í apríl að lögreglu hefðu borist upplýsingar um að Friðriki hefði verið ráðinn bani erlendis, eftirgrennslan lögreglu hafi þó ekki leitt neitt slíkt í ljós.

Nú, um þremur mánuðum eftir hvarf Friðriks, er lýst eftir honum hér heima, en í lýsingu lögreglu segir að Friðrik sé 175 sentímetrar á hæð, bláeygður, grannvaxinn, skolhærður og snöggklipptur.

Þeir sem búa yfir upplýsingum um afdrif Friðriks geta sent póst á lögregluna á netfangið abending@lrh.is.