Götze gerði forráðamenn Adidas brjálaða

Forráðamenn Adidas eru brjálaðir út í þýska landsliðsmanninn Mario Götze eftir að hann mætti í Nike-bol er hann var kynntur til leiks hjá Bayern München.

Adidas hefur lengi átt í afar farsælu samstarfi við Bayern og stjórnarformaður Adidias, Herbert Hainer, situr í stjórn félagsins. Það ku hafa rokið úr honum er hann sá myndirnar af Götze.

"Þessar myndir komu okkur á óvart. Samkvæmt samningi við félagið þá mátti Götze ekki haga sér svona því þetta var viðburður á vegum Adidas. Við erum þegar búnir að ræða þetta mál við forráðamenn Bayern," sagði talsmaður Adidas.

Götze er á samningi hjá Nike og má spila í skóm frá þeim. Hann þarf þó að vera í treyju frá Adidas á slíkum viðburðum.