Haraldur Franklín: Ætla að vinna Birgi Leif næst

Haraldur Franklín Magnús varð að játa sig sigraðan eftir jafna baráttu við Birgi Leif Hafþórsson á Íslandsmótinu í golfi í dag.

Birgir Leifur var að vinna sinn fimmta titil frá upphafi en Haraldur varð Íslandsmeistari í fyrra.

„Ég er ótrúlega tapsár en svona er þetta bara. Ég gerði mitt besta í dag,“ sagði Haraldur í samtali við Vísi.

Haraldur hafði forystu nánast allt mótið en fékk þrefaldan skolla á 16. holu í dag og þar með var draumurinn úti.

„Biggi notaði mig sem héra. Ég leiddi og hann tók svo fram úr í restina. En þetta var mjög skemmtilegt mót.“

„Ég sló í tré á 16. og lenti við gamalt torfufar. Ég þurfti að leggja upp þaðan líka og gat því ekki slegið inn á grín.“

Hann segir Birgi Leif verðugan sigurvegara. „Maður lærir alltaf eitthvað af því að spila með honum. Ég óska honum til hamingju en ég ætla að vinna hann næst.“