Lestu þetta ef þú djammaðir um helgina

Heilsudrottningin Ragga Nagli einkaþjálfari menntuð M.Sc í heilsusálfræði, Stud. Cand. og Psych í klínískri sálfræði skrifaði fróðlegan pistil um áhrifin sem áfengi hefur á líkamann rétt fyrir nýliðna helgi. Hún gaf okkur leyfi til að birta pistilinn í heild sinni.

Mörbúar undirbúa nú stærstu ferðahelgi ársins og má gera ráð fyrir að Bakkus fái að kúra ofan í mörgum svefnpokanum þessa helgina.

Allar hitaeiningar bíða á kantinum

Alkóhól verður fyrsta val líkamans sem eldsneyti og þegar þess er neytt þá bíða allar aðrar hitaeiningar á kantinum og líkur aukast að þær breytist í smjör.

Tómar hitaeiningar

Áfengi inniheldur svokallaðar „tómar” hitaeiningar sem þýðir hitaeining án næringar sem sagt vitamin, trefjar steinefni eru fjarri góðu gamni. Hvert gramm af áfengi inniheldur næstum tvöfalt meira en kolvetni og prótín eða 7 hitaeiningar í grammi á móti 4 í kolvetni og prótínum. 

Einn sveittur með fröllum

Mjöðurinn losar um bremsuna sem við höfum á átvaglinu og lítil sem engin næring í alkóhóli örvar matarlyst. Í stuði undir áhrifum og með berjandi timburmenn í hausnum er heilsusamlegu mataræði oft hent út í hafsauga. Einn sveittur með fröllum verður svo miklu girnilegri en skyr og ávöxtur. 

Fitumagn líkamans hækkar

Léttvín og bjór innihalda mikinn sykur sem veldur losun á háu magni insúlíns sem getur ýtt undir fitusöfnun þar sem orkan er geymd í fitufrumum. Ergo: fitumagn líkamans hækkar.

500 kvekendi í einni flösku

Karólínurnar sem koma úr ranni Bakkusar eru yfirleitt umfram dagsþörf líkamans enda vanalega búið að snæða yfir daginn. Ein lítil dós af 4-5% bjór inniheldur 150 kcal sem þýðir að kippa gefur þér 900 kvikindi aukalega. Í einu 140 ml (meðalstórt) léttvínsglasi eru um það bil 120 snúllur sem þýðir að í einni flösku eru 500 kvekendi.

Fitusöfnun í kjölfar drykkju

Áfengi truflar meltingu prótíns og kolvetna í lifur og hún getur ekki myndað nýjan

glúkósa. Það truflar einnig framleiðslu ensíma í brisi sem sjá um niðurbrot fitu í líkamanum. Sterk tilhneiging verður þess vegna hjá líkamanum til fitusöfnunar og erfitt að byggja upp vöðvavef á meðan alkóhól er svamlandi í „systeminu".

Áfengi þurrkar upp líkamann 

Áfengi þurrkar upp líkamann. Vökvabúskapurinn fer ofan í kjallara við neyslu áfengis því mikið af vatni líkamans þarf til að vinna úr áfengi í nýrum og það nýtist því ekki í aðra nauðsynlega starfsemi á meðan. Það getur tekið líkamann nokkra daga að vinna upp þetta vökvatap.

Allt er best í hófi 

Á því að sleppa áfengi algjörlega og slurka eingöngu eimað vatn úr BPA fríum brúsa? Nei engan veginn… enda lífið of stutt fyrir meinlæti og fullkomið fráhald. Þeir sem á annað borð fá sér í tána alla jafna ættu því ekki að víra saman á sér tennurnar þessa helgina. Í heilbrigðum lífsstíl er pláss fyrir hliðarspor en það gildir um áfengið eins og annað í lífinu… allt er best í hófi. Góða helgi!

Ragga Nagli á Facebook