Benzema tryggði Real Madrid þrjú stig

Franski framherjinn Karim Benzema skoraði eina markið þegar Real Madrid vann 1-0 útisigur á Granada í spænsku úrvalsdeildinni í kvöld. Real Madrid er því með fullt hús eftir tvær fyrstu umferðirnar alveg eins og Barcelona, Atlético Madrid, Athletic Bilbao og Villarreal.

Sigurmark Real Madrid kom strax á 10. mínútu leiksins en Karim Benzema fékk þá boltann eftir að fyrirgjöf Ángel di María fór af Cristiano Ronaldo og til hans.

Cristiano Ronaldo hefur ekki náð að skora í fyrstu tveimur umferðum tímabilsins og það þykja fréttir á þeim bænum.

Diego López stóð áfram í marki Real Madrid og Iker Casillas, landsliðsmarkvörður Spánar, þurfti að sætta sig við að sitja á bekknum í enn einum leiknum.