Raikkonen fílar Spa

Kimi Raikkonen er líklegur til afreka á Spa-brautinni í Belgíu um helgina. Hann hefur náð frábærum árangri á brautinni, sigrað í fjórum af síðustu sex keppnum, einu sinni í 3. sæti og einum hring frá fimmta sigri sínum þar árið 2008.

Aðeins einu sinni hefur hann náð ráspól á Spa, en Raikkonen er þekktur fyrir að ná að sigra í F1, án þess að vera fremstur á ráslínu.

Mikið er rætt og ritað um Raikkonen þessa dagana. Fyrir hvaða lið mun hann aka á næsta ári er ekki ljóst, hann er með samning við Lotus út þetta ár, en bæði Red Bull og Ferrari, hafa verið orðuð við kappann.

Raikkonen gat ekki mætt á fréttamannafund í gær vegna veikinda, en verður klár í slaginn á fyrstu æfingu fyrir belgíska kappaksturinn.