Vettel vann sjöunda kappaksturinn í röð

Sebastian Vettel var að ekkert að slaka á þótt að hann hafi tryggt sér fjórða heimsmeistaratitilinn um síðustu helgi. Þjóðverjinn vann yfirburðarsigur í Abú Dabí kappakstrinum í formúlu eitt í dag.

Sebastian Vettel var að vinna sjöunda kappaksturinn í röð og sinn ellefta kappakstur á tímabilinu. Hann hefur 130 stiga forskot á Fernando Alonso og jók forskot sitt um fimmtán stig í dag.

"Svona keyra meistarar," sagði Christian Horner, yfirmaður Red Bull–Renault, í talstöðinni þegar Sebastian Vettel kom í mark. Það voru orð að sönnu en Vettel var að vinna sinn 37. kappakstur á ferlinum.

Vettel tileinkaði foreldrum sínum sigurinn en þau voru bæði meðal áhorfenda í dag. Hann fagnaði líka eins og síðasta með að reykspóla við mikinn fögnuð áhorfenda.

Red Bull–Renault vann tvöfaldan sigur í dag því Mark Webber, sem var á ráspól, kom annar í mark. Webber datt niður í sjöunda sætið með slæmri ræsingu en vann sig upp í annað sætið. Hann átti hinsvegar aldrei möguleika í Vettel en heimsmeistarinn kom langt á undan honum í markið.

Nico Rosberg á Mercedes varð í þriðja sæti, Romain Grosjean á Lotus-Renault varð fjórði og í fimmta sæti kom síðan Fernando Alonso á Ferrari.

Lokastaðan í Abú Dabí kappakstrinum 2013:

1. Sebastian Vettel, Red Bull-Renault

2. Mark Webber, Red Bull-Renault

3. Nico Rosberg, Mercedes

4. Romain Grosjean, Lotus-Renault

5. Fernando Alonso, Ferrari

6. Paul di Resta, Force India-Mercedes     

7. Lewis Hamilton, Mercedes

8. Felipe Massa, Ferrari

9. Sergio Pérez, McLaren-Mercedes

10. Adrian Sutil, Force India-Mercedes

Staðan í keppni ökumanna:

1. Sebastian Vettel     347 stig

2. Fernando Alonso     217

3. Kimi Räikkönen     183

4. Lewis Hamilton     175

5. Mark Webber     166

Staða í keppni bílasmiða:

1. Red Bull-Renault 513 stig

2. Mercedes 334

3. Ferrari 323

4. Lotus-Renault 297

5. McLaren-Mercedes 94