Vodafone biðst afsökunar

Blaðamannafundur var haldinn í húsakynnum Vodafone í Skútuvogi í dag. Tilgangur fundarins var að veita upplýsingar vegna innbrots á vef Vodafone í gær.

Forsvarsmenn Vodafone báðu alla sem málið snertu afsökunar og munu veita fólki aðgang að gögnum um sig sem gerð voru opinber. Aðspurðir að því hvenær Vodafone komst að því að gögnunum hafi verið stolið sögðust forsvarsmenn fyrst hafa heyrt af því í gegnum fjölmiðla og aðrar ábendingar. Fyrst var talið að aðeins hefði verið brotist inn á síðuna og hún skemmd, án þess að nokkrum gögnum hefði verið stolið.

Eins og komið hefur fram hakkaði tyrkneskur tölvuþrjótur sig inn á vef þeirra í gær, og náði í mjög viðkvæmar persónuupplýsingar um notendur fyrirtækisins. Hann birti svo upplýsingarnar á netinu í gær, meðal annars persónuleg SMS á milli fólks og lykilorð af tölvupóstföngum.

Vodafone hefur afhent lögmönnunum Daníel Isebarn Ágústssyni og Páli Rúnari Kristjánssyni gögnin sem verða gerð aðgengileg í húsakynnum þeirra, Málflutningsstofu Reykjavíkur í Húsi Verslunarinnar, Kringlunni 7, 9. hæð á mánudag og þriðjudag kl. 10.00-16.00 gegn framvísun persónuskilríkja.

Fram kom á fundinum að Vodafone hefur rakið IP-tölu hakkarans til Istanbul og því þykir líklegt að brotið hafi átt sér stað þar.

Gögnin gefa í skyn að hakkarinn hafi byrjað árásina einn en eftir því sem leið á hafi fleiri komið að henni.

Vodafone sagði fjarskiptalög skýrt kveða á um að varðveisla gagna lengur en í 6 mánuði sé óheimil. Ljóst væri að geymsla fyrirtækisins á þeirra hluta vef-sms skilaboða fór fram yfir þann tíma.

Skýrðu þeir þessa geymslu gagnanna með því að viðskiptavinum á heimasíðu stæði til boða að geyma send sms en til að gera það ekki þyrftu þeira að taka tiltekið hak af á síðu sinni þar sem sagði „Vista í samskiptasögu“.

Þá kom fram að við ítarlega skoðun hafi einnig fundist eldri gögn í bakendakerfum sem nú er búið að eyða. Í þessu fælust mistök Vodafone.