Árið 2013 loks á enda

„Við ætlum að halda tónlistarveislu í tilefni þess að árið 2013 er loks á enda,“ segir Sigurður Hólm Lárusson, eða Siggi sax, eins og hann vill láta kalla sig. Hann er einn skipuleggjenda tónleikanna Fokk 2013 sem verða haldnir þann 28. desember.

„Þetta ár er búið að vera svolítið langt. Ég hef rætt þetta við aldraða ættingja og hef komist að því að kynslóðum ber saman um að þetta var ömurlegt ár.

Sumarið var ferlegt, páskarnir voru nú ekkert tl að hrópa húrra fyrir heldur. Við höfum verið að glíma við heimskreppu og erfiða stjórnmálaframvindu.

Ef ég vík svona að því sem hefur verið slæmt fyrir mig persónulega á þessu ári þá má nefna að mig hefur dreymt illa á hverri nóttu, mér er búið að vera illt í fótunum, sem er sennilega gigt, og svo varð ég sköllóttur á þessu ári.

Stjörnuspekingar vilja meina að heimurinn hafi sjaldan náð meiri lægð í andlegum málum eins og á þessu ári.

Ég held að næsta ár verði betra, það getur ekki annað verið. Mér líst mjög vel á næsta ár í tónlist. Þessar hljómsveitir sem koma fram á tónleikunum hafa verið ljósglæta í myrkrinu á þessu ömurlega ári.“

Siggi sax er meðlimur í hljómsveitinni Skelk í bringu. Aðrar hljómsveitir sem koma fram eru Muck, Grísalappalísa og Kælan mikla. Tónleikarnir fara fram á Gauk á stöng klukkan 21, laugardaginn 28. desember.