Harmsaga í Kennedy Center í Washington

Sýningu Þjóðleikhússins, Harmsögu eftir Mikael Torfason, hefur verið boðið á alþjóðlegu leiklistarhátíðina World Stages í Washington í mars.

„Þetta er aðallega stórkostlegur heiður fyrir sýninguna og Þjóðleikhúsið,“ segir Una Þorleifsdóttir, leikstjóri Harmsögu. „Útsendarar Kennedy Center voru staddir hérlendis í öðrum erindagjörðum en var boðið á frumsýninguna og heilluðust svona gjörsamlega.“

Hátíðin sem um ræðir nefnist World Stages: International Theater Festival 2014 og verður haldin dagana 10. til 30. mars. Þar verða sýndar leiksýningar sem þykja skara fram úr víðs vegar að úr heiminum. Harmsaga verður sýnd tvisvar, 15. og 16. mars, og í sömu vikunni verður leikritið Rupert eftir eitt þekktasta leikskáld Ástrala, Lee Lewis, frumsýnt í Bandaríkjunum. Það fjallar um fjölmiðlamógúlinn Rupert Murdoch. Strax á eftir Harmsögu verður svo franskt leikrit með Emmanuelle Riva, aðalleikkonunni í Amour, frumsýnt í Bandaríkjunum.

Hugmyndin er að leika á ensku og verður verkið þýtt og æft upp á nýtt á næsta ári. Ekki er ráðið hver muni sjá um þýðinguna, enda segir Una að samningar hafi verið undirritaðir á föstudaginn var og því ekki búið að ganga frá smáatriðum.

Leikarar í Harmsögu eru Snorri Engilbertsson og Elma Stefanía Ágústsdóttir.