Hamilton vill forðast fleiri einvígi við Rosberg

Lewis Hamilton segir að hann geri allt í sínu valdi til að tryggja að einvígi á milli hans og Nico Rosberg, liðsfélaga hans endurtaki sig ekki. Mikil spenna myndaðist á milli þeirra í Bahrain en þar hafði Hamilton betur eftir talsverðar hrókeringar.

Hamilton hefur haft betur í þremur af fjórum keppnum ársins. Rosberg vann fyrstu keppni tímabilsins og síðan hefur Hamilton verið óstöðvandi í sigurgöngu sinni.

„Nico verður mjög hraður í öllum keppnum sem við förum í,“ sagði Hamilton um liðsfélaga sinn.

Þrátt fyrir að Hamilton hafi haft betur gegn Rosberg undanfarið, leiðir Rosberg enn stigakeppni ökumanna. Hamilton trúir því ekki að hann hafi yfirhöndina enda hefur Rosberg fylgt fast á hæla honum í öðru sæti þegar Hamilton hefur unnið.

„Það eru margar keppnir eftir, svo það er ekki hægt að spá fyrir um hvað mun gerast,“ sagði Hamilton.