Oddviti Framsóknar vill afturkalla lóð til múslima

Sveinbjörg Birna Sveinbjörnsdóttir, oddviti lista Framsóknarflokksins og flugvallarvina, vill að lóð sem var úthlutað til byggingar mosku í Reykjavík verði afturkölluð. Múslimar fengu úthlutað lóð við Suðurlandsbraut í september í fyrra.

„Á meðan við erum með þjóðkirkju eigum við ekki að úthluta lóðum undir hús eins og moskur eða kirkjur fyrir grísku réttrúnaðarkirkjuna,“ segir hún og tekur fram:

„Ég hef búið í um eitt ár í Sádí Arabíu og byggi þessa skoðun mína ekki á fordómum, heldur reynslu.“

Óttast ekki skaðabótamál

Þrátt fyrir að vilja endurkalla lóðina sem trúfélag múslima fékk undir byggingu mosku segist Sveinbjörg vera hlynnt trúfrelsi. „Ég trúi því að allir eigi að geta iðkað sína trú. En mér finnst ekki rétt að múslimar eða önnur trúfélög fái lóðir undir byggingu moskna eða sambærilegra húsa. Mér finnst samt bænahús vera annars eðlis og er ekki mótfallin þeim,“ útskýrir oddvitinn.

Sveinbjörg segist ekki óttast skaðabótamál af hálfu múslima, verði þessi hugmynd hennar að veruleika. 

„Þeim var gefin þessi lóð, þannig að þeir geta líklega ekki farið í skaðabótamál.“

Bænahús eitt – moska annað

Sveinbjörg bjó um tíma í Lúxemborg og vill fara svipaðar leiðir og gert er þar í landi. „Þar eru margir múslimar en engin moska. Þeir sjá hvernig staðan er í París. Þar eru mun fleiri moskur. En reyndar er eðlismunur á því, margir múslimar koma frá gömlum frönskum nýlendum og því þurfa Frakkar að taka allskonar hluti inn í landið.“

Aðilar í Katar eru búnir að stefna að því í tvö ár að byggja mosku og skóla sem kennir fræði múslima í Lúxemborg. Þeir hafa safnað rúmlega þrjú hundruð milljónum í verkefnið. En enn eru engar formlegar moskur í Lúxemborg, þó svo að sex bænahús séu í borginni. Talið er að múslimar þar í landi séu á bilinu 10 til 12 þúsund.

„Það myndu koma peningar að utan ef moska yrði byggð hérna. Ekki spurning. Þeir byrja að streyma inn um leið leyfið fyrir moskunni fæst. Alveg eins og ef kaþólsk kirkja yrði byggð í Sádí Arabíu; þá kæmu peningar frá Vatíkaninu,“ segir Sveinbjörg.

Skoðun byggð á reynslu ekki fordómum

„Við erum búin að búa hér í sátt og samlyndi frá landnámi. Fyrst var það Ásatrú, síðan komu siðaskiptin – allir þekkja þessa sögu. Ég tel bara að á meðan við erum með þjóðkirkju eigi sveitarfélög ekki að úthluta lóðum til byggingu húsa eins og mosku.“ 

Sveinbjörg bendir á að hún hafi búið erlendis lengi, séð heiminn og hafi mikla reynslu af því að búa í fjölmenningarsamfélögum. 

„Það er ekki eins og þessi skoðun sé byggð á fordómum. Ég dæmi bara eftir minni reynslu. Ég er til dæmis nýkomin úr stærstu mosku í heimi í Abú Dabí. Það er engin kirkja þar, eðli málsins samkvæmt. Ég virði siði annarra landa. Ég hyl mig alla eins og tíðkast í þeim löndum og finnst það bara sjálfsagt mál,“ útskýrir hún og bætir við:

„Ég er örugglega eini frambjóðandinn í Reykjavík sem hefur búið annars staðar en á Íslandi. Ég bjó í Sádí Arabíu í um það bil ár. Ég hef ferðast mikið um Arabalöndin. Eins og ég segi þetta eru ekki fordómar, heldur reynslan mín sem útskýrir þessa afstöðu.“

Vakti athygli á málinu á Facebook

Sveinbjörg skrifaði um moskur í Reykjavík á Facebook. „Já, margir virðast hafa skoðanir á þessu,“ segir hún. 

Á Facebook-síðu sinni sagði hún:

„Margir hafa komið að máli við mig og spurt mig hver sé afstaða mín til úthlutunar á lóð undir Mosku í Reykjavík... mjög margir.“

Nokkrir skrifuðu athugasemd við færslu Sveinbjargar. Einn vitnaði í reglur Framsóknarflokksins:

Grundvallarstefnuskrá flokksins hlýtur að eiga að vera leiðarljósið um stefnu flokksins í þessu máli sem öðrum. Þar segir m.a.:

,,II. Mannréttindi

Við berjumst fyrir mannréttindum, virðingu fyrir einstaklingnum og fjölskyldunni. Við höfnum hvers konar mismunun sem gerir greinarmun á fólki t.d. eftir kynþætti, kynferði, tungu, trú, þjóðerni, kynhneigð, búsetu eða stjórnmálaskoðunum. Við munum ávallt verja skoðana- og tjáningarfrelsi, trúfrelsi og friðhelgi einkalífs."

Annar var algjörlega mótfallinn byggingu mosku í Reykjavík:

„Áður en moskulóð er úthlutað held ég að menn og konur ættu að kynna sér ástandið á Norðurlöndunum og víðar vegna múslima og glæpa þeirra og það sérstaklega gegn konum og ungumm stúlkum og læra af þeirri reynslu.Mosku á undir engum kringumstæðum að leyfa hér á landi....“

Athygli vakti að Sveinbjörg Birna smellti á „like-takkann“ við neðri athugasemdina, um að moska eigi alls ekki að rísa í Reyjavík. 

Er þetta færsla sem þér líkar sérstaklega mikið við? Ertu sammála þessari athugasemd?

„Ja, ég reyndi nú að smella á „like“ við allar athugasemdirnar við þessar færslur.“

Þegar blaðamaður athugaði málið, rétt eftir að Sveinbjörg hélt þessu fram kom í ljós að hún hafði aðeins smellt á „like-takkann“ við eina af þeim ellefu athugasemdum við þessa færslu.