Mörg góð skor á fyrsta hring á John Deere Classic

Það er góð ástæða fyrir því að John Deere Classic mótið er í uppáhaldi hjá mörgum kylfingum á PGA-mótaröðinni enda sjást ávalt margir fuglar og góð skor á hinum stutta TPC Deere Run velli þar sem mótið fer fram.

Mótið hófst í dag og eftir fyrsta hring leiða Brian Harman, Zach Johnson og Rory Sabbatini á átta höggum undir pari en þeir léku allir á 63 höggum í dag. Jafnir í fjórða sæti koma þeir Steven Bowdich, William McGirt og Todd Hamilton á sjö höggum undir pari.

Sigurvegari síðasta árs, ungstirnið Jordan Spieth lék fyrsta hring á pari vallar sem þykir ekki mjög gott skor á John Deere Classic en hann er jafn í 82. sæti eins og er. Hinn reynslumikli Steve Stricker sem sigrað hefur á þessu móti þrisvar sinnum á síðustu fimm árum lék fyrsta hring á 68 höggum eða þremur undir pari.

Annar hringur á þessu spennandi móti verður í beinni útsendingu á Golfstöðinni á morgun frá klukkan 19:00.