Ólafía Þórunn Íslandsmeistari í annað sinn

Ólafía Þórunn Kristinsdóttir, GR, tryggði sér í dag Íslandsmeistaratitlinn í höggleik í kvennaflokki. Hún hafði betur eftir spennandi baráttu við Guðrúnu Brá Björgvinsdóttur, GK.

Þetta er í annað sinn sem hún tryggir sér þennan titil en síðast varð hún meistari árið 2011.

Hún spilaði á samtals tíu höggum yfir pari og var á þremur yfir í dag, rétt eins og Guðrún Brá sem sótti að Ólafíu á lokasprettinum. Guðrún Brá fékk fugla á bæði 13. og 14. holu og náði þar með að minnka forystuna í eitt högg.

En á sextándu braut lenti Guðrún Brá í vandræðum og varð að taka víti. Ólafía hélt sínu striki, náði þriggja högga forystu á ný sem hún hélt allt til loka. Guðrún Brá endaði á þrettán höggum yfir pari.

Valdís Þóra Jónsdóttir, tvöfaldur Íslandsmeistari, varð þriðja á átján höggum yfir pari.